Ajet Kuranor:
Allahu i Madhërishëm thotë:
Atë Ditë keqbërësi do të hajë gishtat e duarve të veta, duke thënë: “Ah, sikur ta kisha marrë rrugën (e drejtë) me të Dërguarin! Ah, sikur të mos e kisha bërë filanin mik. [Kuran 25: 27, 28]
Hadith:
I Dërguari i Allahut, Muhammedi, paqja dhe bekimi i Allahut qofshin mbi të, ka thënë: “Njeriu është në fenë e shokut të vet, kështu që shikoni se me kë po shoqëroheni!”[1]
Gjurmë:
Shekiku thoshte: “Shoqërohu me njerëzit siç shoqërohesh me zjarrin, përfiton nga ai, duke u ruajtur të të mos djegë.”
Poezi:
Mos e shiko personin, por kë e shoqëron,
Sepse çdo njeri shokun e tij pason.
Zgjidhe për shoqërim atë që është më i mirë,
E mos e shoqëro të keqin të biesh në mynxyrë.
Mesazh:
El-Ahnef ibën Kajsi i shkroi një mikut të tij: “Kur ta gjesh shokun e përshtatshëm ruaje si sytë e ballit, sepse shoku i përshtatshëm është më i mirë se fëmija i papërshtatshëm, ngase Allahu i Lartësuar i tha Nuhut, paqja e Allahut qoftë mbi të, për të birin e tij: “O Nuh, ai nuk është nga familja jote, ai ka bërë punë të keqe.” [Kuran 11:46]”
Shkëputur nga libri: “Jeumijat saimeh” (Hakibetu saimat) – të autorëve dr. Adil Esh-Shiddi dhe dr. Ahmed El-Mezjed
Përktheu: Jusuf H. Kastrati – Shembulli.com
