Prokuroria Publike e Qarkut në Prishtinë ka konfirmuar zyrtarisht se janë duke zhvilluar hetime intensive ndaj pesë ish-ministrave të Qeverisë së Kosovës dhe paralajmëron se shumë shpejt priten edhe ngritjet e aktakuzave ndaj tyre.
Kryeprokurori, Aleksandër Lumezi, në një intervistë për "Zëri" zotohet se nuk do të kursejnë asnjë person që e ka shkelur, apo që e shkel ligjin, pavarësisht nga pozita që e gëzon, apo që ka gëzuar dikur. Politikanët dhe zyrtarët e lartë të institucioneve të Kosovës, për të janë si të gjithë qytetarët e tjerë."Politikanët janë personalitete kaluese. Ata dikur do të shndërrohen në qytetarë të thjeshtë dhe do të hiqen nga pozitat prej deputeti, ministri apo funksioneve të larta partiake. Pavarësisht pozitave, ne nuk i ndalim hetimet. Mund të them se aktualisht jemi duke hetuar pesë ish-ministra, ndërsa për emrat e qeverisë aktuale, në prokurorinë tonë nuk ka lëndë", ka thënë Lumezi.
Pa një luftë të tillë kundër të gjithë atyre që kanë shkelur ligjin, Lumezi thotë se nuk mund të kemi shtet demokratik dhe shtet ku funksionon rendi e ligji.
Prioritet për të dhe Prokurorinë, siç tha ai, është lufta kundër korrupsionit, por edhe luftimi i dukurive të tjera negative, siç është trafikimi me qenie njerëzore, vrasjet, vrasjet e rënda, kontrabanda, etj. /MIA/
