Ambasadori i Shteteve të Bashkuara të Amerikës Poll Volers dhe ministrja e Kulturës së Republikës së Maqedonisë, Elizabeta Kançeska Milevska, nesër do të nënshkruajnë një marrëveshje për grand në vlerë prej 94.700 dollarë amerikanë për ruajtje dhe restaurim të punimeve të fasadës historike të Xhamisë së Larme në Tetovë.
Ky grand sigurohet përmes Fondit të ambasadorit për mbrojtje të kulturës, program i financuar nga Departamenti i shtetit i SHBA-ve, njoftojnë nga Ambasada amerikane në Shkup.
“Që nga themelimi i Fondit të ambasadorit për mbrojtje të kulturës në vitin 2001, Ambasada e SHBA-ve ka financuar dhjetë projekte në Republikën e Maqedonisë, që ka fituar mbështetjen më të madhe përmes këtij programi nga cilido shtet tjetër në Evropë”, thuhet në njoftimin e ambasadës. Ky program u themelua nga Kongresi i SHBA-ve për të ndihmuar shtetet në zhvillim në mbrojtjen dhe mirëmbajtjen e trashëgimisë së tyre të rëndësishme kulturore. Fondi në fjalë, thonë nga përfaqësia diplomatike, demonstron përkushtimin e SHBA-ve për të mbrojtur trashëgiminë tonë të përbashkët në tërë botën duke ndihmuar në mbrojtjen e pasurive kulturore për gjeneratat e ardhshme.Firmosja zyrtare do të bëhet në oborrin e Xhamisë së Larme në Tetovë./koha.mk/
