Pas reagimit të myslimanëve të fshatit Peshtalovë për ndërtimin e kishës së dytë dhe kërkesës së muslimanëve të këtij fshati për hapjen e paraleles me mësim në gjuhën shqipe, pranimi një pastruesi në shkollën e këtij fshati po nga ky fshat dhe punësimi një arsimtare shqiptare për ligjërimin e gjuhës maqedonase në nëntëvjeçaren "Gjorçe Petrov" të fshatit Ropotovë, mjaftuan për të reaguar jo vetëm banorët maqedonas të Peshtalovës, por edhe të Ropotovës, të cilët shprehen se në dy fshatrat kërkojnë punësimin e maqedonasve, e jo të shqiptarëve.
Për momentin, procesin edukativo- arsimor e bojkotojnë edhe nxënësit maqedonas të të dy fshatrave, duke paralajmëruar se bojkotin do ta vazhdojnë deri në zgjidhjen e kërkesave të tyre. Lidhur me këtë problem të papritur dhe kërkesave joracionale të maqedonasve, biseduam me të ngarkuarin për arsimin në Komunën e Dollnenit, Myzafer Islami, i cili sqaroi se në të dy rastet nuk është bërë kurfarë shkelje ligjore apo diskriminim të dikujt. "Në shkollën e Peshtalovës, kurrë nuk ka pasur të punësuar, sikur edhe pastrues nga radhët e myslimanëve maqedonas apo shqiptarë. Pastruesi ishte nga fshati Sarandinovë, kështu që ky u transferua në shkollën e Ropotovës, ngase shkolla e Peshtalovës është shkollë periferike e shkollës 'Gjorçe Petrov' të fshatit Ropotov, e në vend të tij u pranua në nga fshati Peshtalovë", thotë islami.
Sa i përket rastit me arsimtaren shqiptare, Islami thotë se ajo është e diplomuar në gjuhën maqedonase, duke qenë studente me notë mesatare prej 9.50. "Kjo i irritoi tej mase maqedonasit, të cilët shprehen me fjalë ofenduese në baza fetare e etnike, duke kërkuar që në vend të shqiptares, fëmijëve të tyre gjuhën amtare t'ua ligjërojë një maqedonas i krishterë dhe jo maqedonas mysliman. Dikush kërkon që të acarohen marrëdhëniet dhe të shkaktojë mosdurim ndërfetar dhe ndëretnik. Për këtë unë e kam informuar edhe Ministrinë e Arsimit dhe Shkencës", shprehet Islami. Me deklaratë identike shprehet edhe kryetari i Komunës së Dollnenit, Abdulla Bajramovski.
"Nuk kam gabuar as në njërin e as në tjetrin rast. Ish pastruesit të shkollës së Peshtalovës, që ishte nga fshati Sarandinovë, me transferimin ia shkurtova mundimet rreth udhëtimit, ngase vendin e punës e ka shumë më afër, kurse me një rokadë të këtillë, erdhi koha që pas plotë 70 vitesh, të punësohet një banorë i këtij fshati. Ndërgjegjen e kam të pastër. Rasti me arsimtaren shqiptare ndodhi krejt ndryshe. Arsimtarja e mëparshme maqedonase ishte e punësuar me kontratë në vepër përmes një agjencie për punësim. U ndërpre financimi nga ana e agjencisë, skadoi edhe kontrata. Reagimit të qytetarëve maqedonas iu përgjigja me argumentin se në shkollën nëntëvjeçare të fshatit Debreshtë, edhe pse mbi tetëdhjetë për qind e nxënësve janë shqiptarë e myslimanë, procesin edukativo-arsimor e zhvillojnë arsimtarë maqedonas. Nëse kërkoni shkollë etnikisht dhe në baza fetare të pastër, atëherë do të duhet t'i përjashtojmë nga punë arsimtarët e Debreshtit. Këtë punë e kemi kryer në marrëveshje edhe me drejtoreshën Vera Petkoska, ndaj së cilës protesuesit derdhin gjithë vrerin e urejtjes ndërfetare e ndëretnike. Në të dyja rastet nuk është bërë kurfarë shkeljeje ligjore apo diskriminim, siç kanë ata gjatë punësimeve të kuadrove të tyre, duke i anashkaluar kuadrot nga radhët e shqiptarëve dhe muslimanëve tjerë", shprehet kryetari i Komunës Bajramoski.
"Edhe maqedonasit e kanë të qartë se nuk janë në të drejtë, por kjo është vetëm derdhje mllefi për rastin e kishës, kundër ndërtimit të së cilës nuk jemi, por të ndërtohet në vend të tyre, siç e ndërtuam ne xhaminë në pronën e vakëfit. Unë nuk do të lëshojë pe nga qëndrimet para sulmeve të prindërve të politizuar dhe të stërmbushur me energji negative, me urrejtje", përfundon ai. (Q.H./KOHA)
