Kryeministri turk Rexhep Taip Erdogan në fund të muajit do të mbërrijë për vizitë zyrtare në Shkup. Burime pranë Qeverisë bëjnë të ditur për agjencinë e lajmeve INA se vizita e kryeministrit turk do të ndodhë mes datave 27 dhe 30 shtator, por gjithçka nuk është përfundimtare dhe hollësi mbi vizitën do të jepen në fillim të kësaj jave.
Në kuadër të delegacionit qeveritar nga Ankaraja do të jenë edhe ministra të kabinetit dhe biznesmenë turq, ndërsa në agjendë janë paraparë marrëveshje për intensifikimin e bashkëpunimit ndërmjet dy vendeve në sfera të ndryshme, me theks të veçantë atë ekonomik, por edhe në sferën e sigurisë, mbrojtjes dhe bashkëpunimit ushtarak.
Vizita e kryeministrit turk ishte paralajmëruar që në muajin mars, mirëpo prioritetet e Erdogan kanë bërë që ajo mos të realizohet sipas parashikimeve të planifikuara të autoriteteve të Shkupit. Tanimë për herën e tretë po paralajmërohet kjo vizitë, mirëpo nga Qeveria bëjnë të ditur se ajo përfundimisht do të realizohet. (INA)
