Zëdhënësi i PK-së, Baki Kelani, ka thënë se nga janari i këtij viti e deri më tani kanë ndodhur 30 raste të vrasjeve të ndryshme anembanë Kosovës. Sipas tij, të gjitha rastet, të cilat janë të evidentuara në PK, apo në sistemin informativ të bazës të dhënave të Policisë së Kosovës, në të shumtën e rasteve PK-ja ka arritur t’i arrestojë të dyshuarit, të cilët kanë kryer vepra të tilla kriminale.
Florian Qehaja, njohës i çështjeve të sigurisë në Qendrën për Studime të Sigurisë, ka pohuar se shifra prej 30 rasteve të vrasjeve tregon bindshëm se kohën e fundit kemi një trend te rritjes se vrasjeve dhe krimeve. Sipas tij, rastet e shpeshta të vrasjeve kanë bërë që kjo dukuri të reflektojë edhe në rritje te brishtësisë të sigurisë publike në vend.
“Rastet e vrasjeve në Kosovë vijnë si rezultat i shumë faktorëve, përfshirë qërimin e hesapeve, praninë e madhe të armëve të vogla në popullatë e mbi të gjitha me nivelin e ulët të institucioneve të sigurisë (në ketë rast policisë) për parandalimin e këtyre akteve kriminale”, thotë Qehaja./kosovasot/
