Pas dështimit të takimit me strukturat paralele serbe, forcat e KFOR-it nuk kanë marrë asnjë veprim për heqjen e barrikadave në veri, ndërkohë që nata e kaluar në këtë pjesë të vendit ka kaluar kryesisht e qetë, ndonëse ishte e tensionuar.
Serbët kanë qëndruar edhe mbrëmë pranë barrikadave kryesore në Zupç, Jegenicë dhe Rudare, megjithë që në numër shumë më të vogël sesa netët e kaluara.
Takimi i djeshëm ndërmjet përfaqësuesve të KFOR-it, EULEX-it dhe strukturave paralele serbe në Shtëpinë e BE-së në Mitrovicën e veriut ka përfunduar pa sukses, ndërkohë që i mbetet KFOR-it të veprojë për largimin e barrikadave të vendosura në rrugë nga serbët e rebeluar./kosovapress/
