Janë lëshuar në qarkullim 38 kilometrat e para të autostradës ''Ibrahim Rugova'', e cila do të afrojë edhe më shumë Kosovën me Shqipërinë.
Në ceremoninë solemne kanë marrë pjesë drejtues të lartë të institucioneve të Kosovës, presidentja Atifete Jahjaga, kryeministri Hashim Thaçi, kryeparlamentari Jakup Krasniqi, kryeministri i Shqipërisë Sali Berisha, kongresisti amerikan Eliot Engel, zyrtarë tjerë si dhe shumë qytetarë.
Në hapje të ceremonisë, presidentja Atifete Jahjaga, theksoi se me këtë autostradë po hiqen barrierat e komunikimit mes Kosovës dhe Shqipëri dhe po realizohet ëndrra e pritur shumë gjatë.
Ndërsa kryeministri Hashim Thaçi, deklaroi se kjo rrugë, që me krenari mban emrin Ibrahim Rugova, tha se është projekt i të ardhmes evropiane të Kosovës.
Kanë përshëndetur edhe kryeministri i Shqipërisë Sali Berisha, kongresisti amerikan Eliot Engel, ambasadori amerikan Kristofer Dell.
Kryeministri i Shqipërisë, Sali Berisha, ka folur për rëndësinë e autostradës e cila bashkon edhe më shumë Kosovën dhe Shqipërinë, duke realizuar në këtë mënyrë një ëndërr historike të brezave me radhë.
Kongresisti amerikan Eliot Engel, pasi që ka uruar popullin e Kosovës për autostradën e re, theksoi se kjo është një ditë e shumë e rëndësishme, pasi që Kosova tash është më pranë Evropës.
Ambasadori amerikan Kristofer Dell,tha se përurimi i këtij segmenti rrugor është edhe një hap tjetër drejt ëndrrës së ish-presidentit të Kosovës, Ibrahim Rugovës, emrin e të cilit mban kjo autostradë.
Kostoja e ndërtimit të 38 kilometrave të parë të autostradës ka kushtuar 330 milionë euro.Punimet në autostradë do të vazhdojnë derisa të përfundojë i tërë projekti, i cili pritet të përfundojë në nëntor të vitit të ardhshëm.
Autostrada ”Ibrahim Rugova”, është cilësuar projekt historik për Kosovën evropiane dhe për integrimin e shqiptarëve në BE. Punimet në këtë autostradë është duke i kryer kompania “Bechtel-Enka”.
Autostrada, punimet në të cilën kanë nisur më 25 prill të vitit të kaluar, do të jetë e sistemit të mbyllur dhe hyrje-dalje do të ketë vetëm në kyçjet e autostradës.
Gjerësia e autostradës do të jetë 28 metra, ku do të jenë 4 shirita qarkullues me nga 3.75 metra, 2 shirita për ngadalësim me nga 3 metra, si dhe brezi i gjelbër në mes në gjerësi prej 4 metrash.
Shpejtësia e projektuar përgjatë gjithë gjatësisë së autostradës është 120 km në orë, ndërsa aty ku karakteristikat e lejes mjedisore lejojnë, është gjithashtu e mundshme të zhvillohet një shpejtësi e projektit prej 140 km në orë./RTK/
