I pyetur nga “Bota sot” se a e din policia e Kosovës se çka ka brenda në kamionët me ndihma, të ardhur nga Rusia, zëdhënësi i Policisë së Kosovës në rajonin e Mitrovicës, Besim Hoti ka thënë se policia e Kosovës nuk ka pas qasje në përcjelljen e konvojit dhe as në zhvillimin e procedurave që duhet bërë në raste të këtilla.
“Policia e Kosovës në rastin konkret i ka sigurua të gjitha udhëkryqet përgjatë rrugës kryesore nëpër të cilën janë transportuar ndihmat. Të gjitha veprimet tjera lidhur me këtë aktivitet kanë qenë përgjegjësi e EULEX-it, që i ka ndërmarrë të gjitha procedurat e nevojshme, por ne nuk dimë se a janë kontrolluar kamionët se çka kanë brenda apo jo”, ka thënë Hoti.
Mirëpo, burime nga pika kufitare në Jarinje, kanë njoftuar se kamionët me ndihma i janë nënshtruar kontrollit doganor në Jarinje, me ç’rast doganierët e EULEX-it kanë kryer procedurat e kontrollit doganor dhe lejimin e hyrjes së tyre në Kosovë./bs/
