Komisioni Qendror i Zgjedhjeve nuk ka vendosur ende për regjistrimin e lëvizjes islame “Bashkohu” si parti politike në Kosovë. Sipas udhëheqësve të kësaj lëvizjeje, po tentohet të bëhen pjesë e institucioneve për mbrojtjen e të drejtave të myslimanëve, transmeton KTV.
Fuad Ramiqi, ka vendosur të mos drejtojë partinë, të cilën do ta udhëheqë Arsim Krasniqi. Në statutin dhe programin e kësaj partie nuk flitet për orientimin politik të partisë, por qartësohet, ndër të tjera, se parim themelor i disiplinës në lëvizje është përmbajtja e normave morale të mbështetura në parimet hyjnore.
As neni 8 i Kushtetutës së Kosovës, për udhëheqësit e kësaj lëvizjeje islame, nuk paraqet ndonjë problem. Sipas këtij neni, Republika e Kosovës është shtet laik dhe neutral në çështje të besimeve fetare.
