Konsumatorët e pakënaqur të KEK-ut do të protestojnë sërish. Ata do të mblidhen nesër, më 25 shkurt, meqë sipas organizatorëve janë të irrituar me mosreagimin institucional ndaj hajnive të dukshme në faturimin e energjisë elektrike në muajin janar.
Protesta pritet të mbahet në vendin e njëjtë, para ndërtesës qendrore të kësaj korporate, duke filluar nga ora 12:00. Thirrja për protestë është bërë përmes rrjetit social Facebook. E organizatorët e protestës e quajnë veten “konsumatorët e organizuar të Korporatës Energjetike të Kosovës”. Po ashtu në thirrjen për protestë thuhet se deri më tani nuk ka dhënë përgjegjësi asnjë zyrtar i KEK-ut për keqtrajtim të konsumatorëve. Gjithashtu, ata e kanë arsyetuar protestën me mungesën e ndëshkimeve siç thonë ata “për këtë tentim hajnie të kapur në flagrance”.
”Me shpërfilljen institucionale për rishikimin e politikave tarifore të energjisë elektrike që rezultuan me faturat më të shtrenjta në rajon për konsumatorët kosovarë... Me shpërfilljen e premtimit të dhënë publikisht nga ministri i Zhvillimit Ekonomik, drejtori i KEK-ut dhe ZRRE-ja, që konsumatorët nuk do të penalizohen bazuar në faturat të janarit... Me aksionin e fundit të KEK-ut për shkyçjen e konsumatorëve të shumtë”, këto kanë qenë edhe disa arsye për organizim të protestës.
Me anë të këtyre protestave ata do të kërkojnë hetime dhe dorëheqjen e të gjithë përgjegjësve të KEK-ut.
“Hetimi, konstatimi dhe përmirësimi i të gjitha faturave të muajit janar, të lëshuara nga Korporata Elektroenergjetike e Kosovës. Dorëheqjen e gjithë zinxhirit menaxherial, që me pjesëmarrje aktive ose me neglizhence i ka kontribuar kësaj tentative për hajni. Fillimin e hetimeve nga prokuroria për të gjithë personat që aktivisht i kanë kontribuar këtij skandali”, kanë qenë disa nga kërkesat e protestueseve.
Ata, po ashtu do të kërkojnë rishqyrtimin e politikave tarifore të ZRRE-së dhe KEK-ut, që do të rezultojnë me fatura të energjisë elektrike që janë konform standardit të qytetarëve të Kosovës.
“Ngrirja e faturave të janarit dhe stopimin e aksionit të shkyçjeve bazuar në këto fatura deri në adresimin e plotë të shqetësimeve tona”, thuhet në komunikatën e lëshuar për media, nga grupi i organizatorëve të protestave.
Konsumatorët i kanë bërë thirrje Policisë së Kosovës që të mos asistojnë KEK-un në fushatën e shkyçjeve.
“Duke qenë të bindur se aksioni i shkyçjeve paraqet këmbëngulje të Korporatës për ta çuar përpara hajninë e filluar dhe duke qenë të bindur në drejtësinë e kërkesave tona, ne u bëjmë thirrje qytetarëve që deri në përmbushjen e këtyre kërkesave në mënyrë të organizuar, por të padhunshme të pengojnë shkyçjen e konsumatorëve të KEK-ut përmes protestave të hënën”, thuhet në thirrjen për protestë.
Njëri nga organizatorët e protestës, duke mos dashur që t’i ceket emri, ka thënë se protestat nuk do të ndalen deri në plotësimin e të gjithë kërkesave të qytetarëve.
“KEK-u na ka rrejt kur ka thënë se nuk do të ketë shkyçje, pasi ato tashmë kanë filluar pasi ashtu është vendosur, prandaj do të protestojmë”, ka thënë ai./koha/
