Vizita e fundit në Arabinë Saudite e Barack Obamas, përpara se ai të dorëzojë mandatin e kreut të shtetit amerikan, po vijon nën klimën e tensionimit ndërmjet dy vendeve.
Projektrezoluta, që ka jo pak gjasa të miratohet nga Kongresi amerikan dhe akuzon Mbretërinë Saudite për sulmet e 11 shtatorit 2001 në SHBA, u prit me reagime të fuqishme nga Riadi.
Tensionimi SHBA-Arabi Saudite u duk qartë edhe në ceremoninë e pritjes së Presidentit Obama, ku nuk shkoi vetë Mbreti Salman, por mëkëmbësi (prefekti) i tij në Riad.
Pavarësisht tensionimit mes dy vendeve, liderët përcollën mesazhin e vijimit të miqësisë dhe të bashkëpunimit strategjik.
Gjatë takimit rreth 2 orë të gjatë, Mbreti Salman dhe Presidenti Obama diskutuan për situatën e tensionuar në Lindjen e Mesme, për krizën siriane dhe terrorin e DAESH-it.
Dy liderët ranë dakord për të mbështetur fuqishëm vazhdimin e armëpushimit, gjithsesi të brishtë, në Siri, si dhe për të ndihmuar tranzicionin politik në këtë vend.
Në takim, palët shqyrtuan në detaje edhe praninë e DAESH-it në Irak duke theksuar rëndësinë dhe domosdoshmërinë e pastrimit të rajonit nga terrori.
Presidenti Obama, nga ana e tij i përcolli Mbretit Salman shqetësimet në lidhje me shkeljet e të drejtave të njeriut në Arabinë Saudite.
