Së paku 20 persona janë vrarë, ndërsa 150 janë plagosur në mëngjesin e sotëm gjatë një sulmi ajror të ushtrisë siriane në vendin e banuar Duma, në rajonin e Damaskut, raporton Anadolu Agency (AA).
Burimet spitalore nga Duma raportojnë se trupat besnike të regjimit të presidentit, Bashar al Asad kanë kryer sulmin ajror, ku në vendin e banuar hodhën pesë bomba vakum.
I njëjti burim raporton se në mesin e të vrarëve ishin disa gra dhe fëmijë, ndërkohë që në mesin e të plagosurve disa janë në gjendje kritike për jetën.
Aktivisti vendor nga Duma, Yusuf Al Bustani ka thënë për AA se nga sulmi janë shkatërruar disa ndërtesa dhe shtëpi dhe se banorët nën rrënoja nxorën trupat e viktimave. "Forcat e regjimit në përvjetorin e revolucionit kombëtar vazhdojnë me masakrën në Duma. Tashmë dy ditë është objektivë e sulmeve të pandërprera artilerike", ka thënë Bustani.
Nga Këshilli Revolucionar i Sirisë sulmin e sotëm ajror të ushtrisë e kanë quajtur një "masakër".
