Një vajzë e moshës 21 vjeçare është plagosur nga një plumb qorr në krah, kurse dhjetëra qytetarë të tjerë kanë kërkuar ndihmë mjekësore në Klinikën Emergjente në Prishtinë, nga lëndimet e marra nga festimet për Vitin e Ri.
Një qytetar është goditur rëndë nga një makinë në Prishtinë.
Mësohet se drejtuesi i makinës ka ikur nga vendi i ngjarjes, ndërsa qytetari i aksidentuar është dërguar në emergjencë nga një qytetar tjetër.
Bëhet e ditur se personi i aksidentuar është në gjendje të rëndë shëndetësore.
Konfirmimin për KosovaPress e ka bërë mjekja kujdestare në Emergjencë, Nergjivane Halimi, nga Qendra Klinike Universitare e Kosovës, duke shtuar se prej orës 19:00 dhjetëra qytetarë kanë kërkuar ndihmë mjekësore.
“Prej orës 19:00 kemi dy 13 raste me mjete piroteknike - lëndime të gishtave të duarve. Një e kemi edhe me lëndim të fytyrës. Kemi po ashtu aksidente komunikacioni. Prej tyre një është në gjendje të rëndë në mjekim intensiv. Raste tjera që kemi zakonisht ne janë lëndime në shtëpi, sëmundje të sistemit kardiovaskular, lëndime të ekstremiteteve gjatë rrëzimit”, tha mjekja kujdestare në Emergjencë, Nergjivane Halimi.
Burime të Indeksonline bëjnë me dije se një person, 45 vjeç, nga komuna e Podujeves ka marrë lëndime të rënda nga mjetet piroteknike.
Rastin në fjalë e ka konfirmuar edhe mjeku kujdestar në këtë komunë.
"Po një person është lënduar, ai është duke u dërguar për në QKUK", ka thënë ai për Indeksonline.
